Во периодот од 19 до 21 мај 2026 година, во Охрид се одржа Работилница за зајакнување на соработката во областа на радијационата и нуклеарната сигурност помеѓу регулаторните тела од Северна Македонија, Бугарија и Србија.
Работилницата претставуваше значајна можност за продлабочување на регионалната соработка и размена на искуства и добри практики во областа на радијационата и нуклеарната сигурност. На настанот учествуваа претставници на надлежните регулаторни тела од трите држави, кои преку презентации и дискусии ги претставија националните регулаторни рамки, клучните приоритети и актуелните предизвици со кои се соочуваат во своето работење.
Во рамки на работните сесии беа разгледани прашања поврзани со регулаторниот надзор, како и законодавната и регулаторна рамка во секој од присутните држави. Посебен акцент беше ставен на важноста од навремена комуникација и воспоставување контакт точки помеѓу регулаторните тела, размена на информации, едукација на вработените и организирање заеднички вежби.
Учесниците дискутираа и за можностите за понатамошно унапредување на соработката преку организирање заеднички обуки и работилници, размена на експертиза и искуства, како и зајакнување на механизмите за меѓусебна поддршка и координација.
Работилницата заврши со изнесување на предлог заклучоци и договор за идни активности насочени кон зајакнување на регионалната соработка, унапредување на капацитетите на регулаторните тела и натамошно подобрување на радијационата и нуклеарната сигурност во регионот.
